經濟資助
「你架輪椅係咪電動㗎？幾錢呀？喺邊度買？」間唔中就會俾人問呢啲問題，通常問我嘅人都係屋企人有需要，佢哋搵緊合適嘅醫療用品，又或者都係輪椅人士，大家交換下情報。不過唔好誤會，呢篇文唔係教大家點揀輪椅，呢啲交返俾專業人士啦，今次係想講一個最現實都係好多人關心嘅話題──money money money！
對唔少傷健人士嚟講，復康器材同醫療用品係佢哋嘅生活必須品，不單止幫助使用者維持健康水平（例如呼吸機、氣墊床等），亦都令傷健人士可以更獨立同方便地生活（例如輪椅、助聽器等）。然而，經濟因素可能會成為病人購買醫療器材嘅障礙，佢哋可能要退而求其次，購買價錢較便宜但可能質素冇咁好、冇咁切合需要嘅選擇，甚至放棄購買。不過又唔使咁灰嘅，因為其實社會上有唔同嘅基金同資助計劃為有需要人士提供經濟援助。另外，因為筆者係一位學生，所以今次都會介紹不同機構為SEN（Special Educational Needs）學生提供嘅資源。
1.社會福利署──醫務社會服務
呢個可能係最為人熟悉嘅一個資助途徑。社署嘅醫務社會服務所提供嘅經濟援助包括公立醫院及診所費用減免機制、申請基金、轉介病人申請社會保障福利金（如綜援）等。有需要病人及家屬可以直接向醫務社會服務部申請，亦可經醫護人員或社福機構轉介申請。
醫務社會服務單位名單、地址、電話、服務時間請按此。
除咗社署之外，社會上都有唔少非政府組織為有需要人士伸出援手，香港傷健協會就係其中一個。該協會有針對不同需要同年齡層對象嘅不同基金計劃，包括「安居樂」生活改善計劃、傷健兒童及青少年基金、贊助基金、協會助學基金以及李鈞洪教育基金。
另一個同樣係服務傷健人士嘅機構就係香港傷殘青年協會。該機構嘅何金容基金正正就係為需要購買醫療器材及用品但有經濟困難嘅傷健人士而設。
以上介紹嘅資助計劃大多數都係need-based嘅，即係可能需要經過治療師專業評估申請人所需，同埋需要審查申請人嘅財政狀況。不過幾時都話做學生就最幸福㗎喇，以下介紹嘅基金計劃就係專門為有SEN嘅莘莘學子而設。
4.香港特別行政區政府獎學金──展毅表現獎、展毅獎學金
顧名思義，就係專為SEN學生而設嘅「船」。呢隻「船」於2013/2014學年成立，嘉許有傑出表現嘅SEN專上學生，包括本地及非本地生，獎學金金額均為1萬元。剛過去的2016/2017學年就有約200名學生獲獎。
呢個基金比較特別，係同「資助專上課程學生資助計劃（TSFS）」及「專上學生資助計劃（FASP）」掛鉤。獲發呢個助學金嘅資格包括1)有特殊學習需要，以及2)符合上述兩個計劃其中一個的申請資格並通過入息及資產審查。簡單啲嚟講，如果有申請TSFS或FASP嘅SEN同學仔不妨可以申請埋呢個關愛基金嘅助學金，金額就同grant一樣視乎申請人家庭財政狀況而有所不同，而2017/2018學年最高金額為$8,550。
上述兩個獎學金、助學金嘅對象都係得大專生、大學生，而呢個教育基金嘅受惠者就包括埋中小學生，而且專門資助本地SEN學生嘅教育相關開支。
一個典型merit-based嘅獎學金，不過專為SEN學生而設。叫得做「船」，要求都唔會低㗎喇，院校提名同面試就唔少得。研究生同本科生獎學金金額分別為$50,000同$40,000。各位同學仔要俾心機讀書，可能下個就係你喇！（筆者表示自我鼓勵中……）
咦，個名同上一個咁似嘅，留意返係多咗「海外」兩個字嘅，因為呢個真係一隻浮洋過海嘅「船」。如果各位SEN同學仔有意去海外留學，可以考慮申請呢個獎學金。研究生同本科生獎學金最高金額分別為$300,000同$280,000，期限最高可達3年，即係如果個課程係超過3年的話，第3年後就要考慮其他方法例如申請貸款，以便繼續學業。
9.其他
以上幾個係比較general，不同院校以及不同身體狀況嘅同學都可以受惠嘅獎學金同資助基金。其實各大院校都有各自嘅獎學金，而有啲機構都會為個別類別嘅SEN學生提供援助，各位同學仔可以留意同查詢就讀院校同相關機構。
希望呢啲資料會幫助到各位傷健／ＳＥＮ朋友﹗
Comentarios